ໃນວັນທີ 28 ຕຸລາ 2021 ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ເນັ້ນເນັ້ນໃຫ້ຄະນະສະເພາະກິດ ເພື່ອປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດ ໂ ຄ ວິ ດ-19 ຂັ້ນແຂວງ-ເມືອງ ແລະຂະແໜງການກ່ຽວຂ້ອງເອົາໃຈໃສ່ປະຕິບັດ 8 ວຽກ ເພື່ອເປັນການຕ້ານການແຜ່ລະບາດຂອງພະຍາດດັ່ງກ່າວ ໃຫ້ຢຸດຕິລົງໂດຍໄວ.
ສໍາລັບ 8 ວຽກ ເພື່ອປ້ອງກັນ ແລະ ສະກັດກັ້ນການລະບາດຂອງພະຍາດໂຄວິດ-19 ປະກອບມີ: ເລັ່ງຊອກຫານໍາເອົາບຸກຄົນ-ກຸ່ມຄົນທີ່ມີຄວາມສ່ຽງສໍາຜັດໃກ້ຊິດກັບຜູ້ຕິດເຊື້ອ ເພື່ອມາກວດຫາເຊື້ອ ແລະ ກັກບໍລິເວນຕາມລະບຽບການໃຫ້ໄດ້ຢ່າງວ່ອງໄວທັນການ; ຮີບຮ້ອນກວດກາຄືນຄວາມພ້ອມດ້ານສະຖານທີ່ປິ່ນປົວ, ວັດຖຸອຸປະກອນທີ່ຈໍາເປັນ ອື່ນໆ (ໂຮງໝໍເກົ່າ, ໂຮງໝໍພາກສະໜາມ ແລະ ໂຮງໝໍທະຫານແຂວງ) ຕາມທີ່ໄດ້ຕົກລົງຜ່ານມາໃຫ້ສາມາດຮອງຮັບຜູ້ຕິດເຊື້ອເພີ່ນຂຶ້ນຄືປະຈຸບັນ, ຖ້າບໍ່ສາມາດຮັບໄດ້ກໍໃຫ້ຄົ້ນຄວ້າຫາທາງອອກໃໝ່ທີ່ເໝາະສົມ; ຮີບຮ້ອນເລັ່ງທວງເອົາອຸ ປະກອນກວດຫາເຊື້ອເຄື່ອງໃຫຍ່ນໍາກະຊວງສາທາໃຫ້ໄດ້ໄວທີ່ສຸດ.
ສືບຕໍ່ໂຄສະນາປະຊາສໍາພັນທາງສື່ຕ່າງໆໃຫ້ກ້ວາງຂວາງກວ່າເກົ່າ ເພື່ອໃຫ້ປະຊາຊົນເຂົ້າໃຈຈະແຈ້ງໃນການດໍາລົງຊີວິດແບບໃໝ່ ແລະ ໃຫ້ພະນັກງານ-ເຈົ້າໜ້າທີ່ລັດຕ້ອງເປັນແບບຢ່າງໃນການໃຊ້ຊີວິດ ແລະ ການປະຕິບັດວຽກງານ; ສືບຕໍ່ສັກຢາວັກຊິນໃຫ້ໄດ້ຫຼາຍເທົ່າທີ່ຈະຫຼາຍໄດ້ ໂດຍສະເພາະເຂດເມືອງລະມາມ ແລະເມືອງທ່າແຕງໃຫ້ໄດ້ 70-80%; ສືບຕໍ່ຄຸ້ມຄອງຄົນເຂົ້າ-ອອກແຂວງຢ່າງເຂັ້ມງວດຜູ້ທີ່ມາແຕ່ເຂດສ່ຽງ (ບ້ານແດງ) ບໍ່ອະນຸຍາດໃຫ້ເຂົ້າມາແຂວງເດັດຂາດ ແລະ ໃຫ້ປະຕິບັດຕາມແຈ້ງການຂອງຄະນະສະ ເພາະກິດແຂວງ-ເມືອງຢ່າງເຂັ້ມງວດ.
ເຈົ້າໜ້າທີ່ ປກສ ແຂວງ-ເມືອງ ຕ້ອງໄດ້ເປັນເຈົ້າການເຄື່ອນໄຫວກວດກາໃນເທສະບານແຂວງ-ເມືອງເປັນປົກກະຕິ, ຖ້າພົບເຫັນບຸກຄົນ, ກຸ່ມຄົນທີ່ລະເມີດລະບຽບຄະນະສະເພາະກິດແມ່ນໃຫ້ປະຕິບັດມາດຕະການຢ່າງເຂັ້ມງວດ ແລະ ຄະນະຮັບຜິດຊອບດ້ານງົບປະມານແມ່ນໃຫ້ເອົາໃຈໃສ່ເບີກຈ່າຍງົບ ປະມານໃຫ້ເຈົ້າໜ້າທີ່ສາທາລະນະສຸກ, ເຈົ້າໜ້າທີ່ ປກຊ-ປກສ ແລະ ພາກສ່ວນກ່ຽວຂ້ອງອື່ນໆເປັນປົກກະຕິ ເພື່ອຮັບປະກັນໃຫ້ທຸກວຽກງານທີ່ຄະນະສະເພາະກິດວາງອອກໄດ້ຮັບການຈັດຕັ້ງປະຕິບັດຢ່າງມີປະສິດທິພາບ, ປະສິດທິຜົນ ແລະ ທັງເປັນການຕ້ານການແຜ່ລະບາດຂອງພະຍາດດັ່ງກ່າວໃຫ້ຢຸດຕິລົງໂດຍໄວ.
ປັດຈຸບັນ, ແຂວງເຊກອງມີຜູ້ຕິດເຊື້ອພະຍາດ ໂ ຄ ວິ ດ-19 ສະສົມທັງໝົດ 20 ຄົນ ໃນນີ້ປິ່ນປົວຫາຍດີແລ້ວ 7 ແຕ່ຖ້າທຽບໃສ່ຫຼາຍແຂວງ ກໍຖືວ່າເປັນແຂວງໜຶ່ງທີ່ມີຕົວເລກຜູ້ຕິດເຊື້ອໜ້ອຍ ເຊິ່ງໃນໄລຍະຜ່ານມາ ການປິ່ນປົວ, ການຄວບຄຸມ-ຄຸ້ມຄອງຜູ້ຕິດເຊື້ອ ແລະ ກຸ່ມສ່ຽງຕ່າງໆເຫັນວ່າ ໄດ້ມາດຕະຖານລະດັບຊາດ, ທັງໝົດນັ້ນ ແມ່ນການນໍາພາ-ຊີ້ ນໍາຂອງຄະນະພັກ-ຄະນະນໍາແຂວງ, ຄວາມຮັບຜິດຊອບຄວາມເປັນເຈົ້າການຂອງຄະນະສະເພາະກິດ, ການຮ່ວມມືຂອງປະຊາຊົນ, ຄວາມເປັນເຈົ້າການຂອງພະນັກງານແພດ-ໝໍ ແລະ ເຈົ້າໜ້າທີ່ທຸກຂະແໜງການ.
