ຕໍ່ສະຖານະການໂຄວິດ 19 ຫຼາຍຄົນກໍມີຫຼາຍວິທີໃນການປ້ອງກັນ, ປົວຕົນເອງຈາກການຕິດເຊື້ອໂຄວິດ 19 ເຊິ່ງຕາມສື່ອອນລາຍຕ່າງໆແມ່ນເຫັນໄດ້ຫຼາຍວິທີຈາກຫຼາຍໆຄົນທີ່ລົງໃນສື່ຕ່າງໆຢ່າງແຜ່ຫຼາຍ ແຕ່ເຮົາບໍ່ອາດຮູ້ໄດ້ເລີຍວ່າຂໍ້ມູນນັ້ນດີແທ້ ຫຼື ບໍ່ ສະນັ້ນການເສບຂ່າວຄວນມີສະຕິ ແລະ ຕິດຕາມຂ່າວທາງການ ຫຼື ຈາກທາງຄະນະສະເພາະກິດແມ່ນດີທີ່ສຸດ
ດັ່ງເມື່ອບໍ່ດົນມານີ້ໄດ້ຖືແຊ ແລະ ເວົ້າເຖິງກັນຫຼາຍໃນໂລກອອນລາຍ ກ່ຽວກັບ ການດົມຫົວຜັກກະທຽມ ແລະ ຫອມບົ່ວແດງ ຊ່ວຍຕ້ານ ແລະ ປ້ອງກັນໂຄວິດໄດ້ ແຕ່ຄວາມຈິງແລ້ວບໍ່ແມ່ນເດີ້
ທ່ານ ດຣ ສີສະຫວາດ ສຸທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໄດ້ຊື້ແຈ້ງວ່າຕໍ່ເລື່ອງນີ້ວ່າ ການດົມຫົວຜັກບົ່ວ-ຫົວຜັກທຽມ ສາມາດປ້ອງກັນພະຍາດໂຄວີດ19 ໄດ້ນັ້ນ, ໃນທາງວິທະຍາສາດແມ່ນບໍ່ສາມາດປ້ອງກັນໄດ້ ສະນັ້ນແນະນໍາໃຫ້ບັນດາທ່ານຢ່າຫຼົງເຊື່ອຂໍ້ມູນທີ່ບໍ່ມີຄວາມເປັນຈິງ.
ສະນັ້ນແລ້ວ ໃຫ້ທຸກຄົນເຂົ້າໃຈຕາມນີ້ດ້ວຍ ແລະ ສິ່ງປ້ອງກັນທີ່ດີທີ່ສຸດເລີ່ມຈາກໂຕເຮົາເອງ ຄືປະຕິບັດມາດຕະການ ຫ້າມອອກຈາກເຮືອນຖ້າບໍ່ຈໍາເປັນ, ຫ້າມການເດີນທາງໄປບ່ອນທີ່ສ່ຽງ, ບໍ່ໄປສະຖານທີ່ແອອັດ, ສະຖານທີ່ອາກາດບໍ່ຖ່າຍເທ, ບໍ່ໃຫ້ຊຸມແຊວເປັນກຸ່ມ, ຮັກສາໄລຍະຫ່າງ, ໃສ່ຜ້າອັດປາກ-ດັງ, ລ້າງມືເລື້ອຍໆດ້ວຍສະບູ ແລະ ນ້ຳສະອາດ ຫຼື ເຈວລ້າງມືທີ່ມີທາດເຫຼົ້າ 70 ຂື້ນໄປ, ຮັກສາມາລະຍາດໃນການໄອ-ຈາມ.
