ໂດຍສືບຕໍ່ປະຕິບັດຕາມຄໍາສັ່ງເລກທີ 06/ນຍ ແລະ ແຈ້ງການ 524/ຫສນຍ ກອງພັນປ້ອງກັນເຄື່ອນທີ່ ປກສ ນວ ສົມທົບກັບທະຫານ ນວ ອອກກວດກາລາດຕະເວນ ໃນຄືນວັນທີ 13 ພຶດສະພາ 2020 ຕາມເສັ້ນທາງໂພນເຄັງ-ດອນໜູນ-ທ່າງ່ອນ ພໍໄປຮອດເຂດປໍ້ານໍ້າມັນ ເຂດບ້ານດ່ານຊ້າງ ພົບເຫັນກຸ່ມຄົນຈໍານວນໜື່ງ ມີພຶດຕິກໍາໜ້າສົງໄສ ເຈົ້າໜ້າທີ່ຈຶ່ງຂໍເຂົ້າກວດກາ ພົບຢາບ້າລວມມີ 20 ເມັດ ຊຸກເຊື່ອງໄວ້ຂ້າງກໍາແພງ ຈິ່ງກັກຕົວມາສອບສວນ.
ຜ່ານການສອບສວນເບື້ອງຕົ້ນ ກຸ່ມມົ້ວສຸມຢາເສບຕິດມີທັງໝົດ 6 ຄົນ ຄື: ທ້າວ ຊາດ ອາຍຸ 48 ປີ ກຳມະກອນ ຢູ່ບ້ານຫ້ວຍເຕີຍ, ທ້າວ ເຈອາມອນ ອາຍຸ 24 ປີ, ທ້າວ ສີອໍາໄພ ອາຍຸ 20 ປີ, ທ້າວ ສະຖາພອນ ອາຍຸ 26 ປີ ທັງ 3 ຄົນ ກໍາມະກອນ ຢູ່ບ້ານດ່ານຊ້າງ,
ທ້າວ ວິໄຊ ອາຍຸ 38 ປີ ກໍາມະກອນ ຢູ່ບ້ານດອນຕີ້ວ ເມືອງໄຊທານີ ແລະ ທ້າວ ເຄ ອາຍຸ 38 ປີ ກໍາມະກອນ ຢູ່ບ້ານຫາດກັນຊາ ເມືອງແກ້ວອຸດົມ ແຂວງວຽງຈັນ ແລະ ພວກກ່ຽວຍອມຮັບສາລະພາບວ່າໄດ້ຮ່ວມກັນມົ້ວສຸມຢາເສບຕິດແທ້.
ມາວັນທີ 15 ພຶດສະພາ 2020 ກອງພັນປ້ອງກັນເຄື່ອນທີ່ ປກສ ນວ ໄດ້ມອບຕົວທັງ 6 ຄົນ ໃຫ້ພະແນກສະກັດກັ້ນ ແລະ ຕ້ານຢາເສບຕິດ ຫ້ອງຕໍາຫຼວດ ປກສ ນວ ເພື່ອສືບສວນ-ສອບສວນ ຂະຫຍາຍຜົນຫາກຸ່ມແກ້ງມົ້ວສຸມ ແລະ ຜູ້ທີ່ຄ້າຂາຍຢາເສບຕິດ ມາລົງໂທດຕາມລະບຽບກົດໝາຍ.
ປກສ ນະຄອນຫລວງວຽງຈັນ
